Rapport sur L ouverture de noble Fransoys d agoult

L'an mil Cinq cens soixante neuf et le vingt troisiesme Jour du mois de Janvier A moy greffier du présent Lieu de rougnes soubzsigné A Rapporté et faict son Rapport Jordain eymar maitre chirurgien du Lieu de lambesc Luy en L'année dernière mil cinq cens soixante huict du sixiesme jour du mois de febvrier que feu noble Francoys dagoult escuier dudict rougnes décéda et alla de vie a trespas Et a la Requeste de Noble Honoré dagoult escuier et seigneur dudict Rougnes son paire Avont Iccelluy Francoys d agoult ouvert accompagné de Loys eymar mon filz et après L avoir ouvert et Incisé en présence *dudict noble Honoré dagoult seigneur dudict rougnes du seigneur de vergnieres et de noble damoysele margarite de septre sa seur femme sudict feu francoys d agoult ni plusieurs aultres adsistens a la sale neufve du château dudict rougnes Luy avoyr en présence desdicts seigneurs de Rougnes de vergnieres et autres dessusdict et adsistens treuvé certaine grande quantité d'eaue dans son ventre et son estomnac et avoir treuvé L'estomnac vuide et sans nule substance aultre de quoy n'avoict aulcune nourriture dans son estomac La Raison c'est que le fege et de L'eau estoit tout putréfat et pourri sorti hors de cognoiscance et sans la cognoiscance du feau neussent sceu dire que cestet si pierre ou quoy aultre chose ** sans la cognoiscance du feau questet tenent avec le feoit questet comme pierre sans substance puis ont faict L'ouverture et notomie sur La Ratale Laquelle ont treuvé a la forme d'ung Rapte grosse pourrie Et puis sont venus aux Reins et ont treuvé Les reins pourris pleins d'apoustuent avec grande putréfac dumidité fleaumatique tant a la voye urinalle que spermatique de quoy voyant l'infirmité desdites parties nobles et Intérieures ledict eymar et sondict filz berbiers sont esmerveilhés comme ledict feu francoys dagoult a tant vescu Ainsi faisant son rapport A moy dict greffier et en foy de ce c'est soubzsigné                   JORDAN EYMAR SIRURGIEN                         DE LANBESC   Et moy jehan Simon greffier audict rougnes soubzsigné au Rapport dudict eymar                                                J SIMON greffier