Aujourd'huy dixiesme du mois d'aoust l'an mil six cens cinquante six jour de feste Saint Laurent, au lieu de Saint Illide et au devant la grand porte de l'églize parrochelle dudict lieu entour dix heures du matin par devant le notaire royal soubzsigné en la présance des tesmoings bas nommés, s'est présanté en sa personne Messire Jean de Planhes escuyer prebtre et docteur en théologie, lequel dressant ses parolles a messire Guyon de Prallat aussi escuyer prebtre et prieur de la parroisse Saint Victor comprins au devant ladicte
porte de ladicte esglize luy a dit avoir esté proveu par messire Pierre de La Vallette
Seigneur prieur dudict Saint Illide de la cure et viccarie perpétuelle dudict Saint Illide et
suivant ladicte provizion il a obtenu Colloquation et Institution du Seigneur évesque de Saint Flour en date du vingt deuxiesme Juilhet dernier qu’il a monstrés et exibés, et a requize suivant Icelle le voulloir mettre et installer en la réelle actuelle et corporelle possession de ladicte cure et viccarie perpétuelle fruictz proffictz revenuz esmollumans appandances et deppandances d'Icelle, ce que ledict sieur de Prallat a offert faire, et après avoir

Page 2
prins avec tout Honneur Respect et Révérance lesdictes Lettres de provizion et Colloquation et en avoir faict lecture prenant par la main ledict de Planhes a faict ouverture de la porte de ladicte esglize l’a faict entrer dans Icelle et après avoir salué le Saint Sacrement de l'auteil luy a fait prandre l'aspersoir de l'eau benicte de laquelle il a donné aux habitans qui estoient en ladicte esglize luy a fait prandre la corde de la grand
cloche qu’il a faicte sonner luy a fait baizer le grand auctel de la dicte esglize toucher les rellicques d'Icelle esglize ensemble les callices et autres ornemans d'Icelle, et ensuite de ce en la présance de plusieurs habitans de ladicte parroisse l’a miz et installé en la réelle actuelle et corporelle possession de la dicte cure et viccarie et en tesmoinaige de ce Ledict de Planhes a dict et cellébré la grand messe de parroisse en ladicte esglize en la présance
desdictz habitans, comme aussi des prestes de la Communaulté de ladicte esglize que y ont assisté et faict l'office d'icelle

Page 3
Sans qu’il y aye heu aulcune opposition ny empeschemant quelconque, dont Nous a
requiz acte que luy avons concédés pour luy valloir et servir a telles fins que de raison, faict ez présances de vénérable et discrette personne messire Louis Bac prebtre
et curé de Teyssieres et Pierre Chavanel de Sournac parroisse dudict Teyssieyres tesmoings
Signés avec Lesdicts sieurs de Planhes requérant, Prallat et moy

                                               D  ESPINASES   notaire royal

Pour servir audict sieur De Planhes ce recquérant